WANANCHI 6000 walioondolewa kupisha hifadhi ya Taifa ya Ruaha waazimia kurudi kama serikali haitawapa maeneo mbadala

Mto Ruaha eneo la Ipogolo, Iringa mjini.

WANANCHI  6,000 katika kata ya Msangaji,Mawindi,Utengule na Madibira wilayani Mbarali mkoani Mbeya walioondolewa katika maeneo yao kupisha hifadhi ya taifa ya Ruaha wameazimia kurudi katika maeneo yao ya awali kama serikali haitakuwa imewapa maeneo mbadala.

Wanachi hao waliokuwa wakiishi katika vijiji saba vya kata hizo walifikia uamuzi huo juzi kwenye mkutano wao na mkuu wa wilaya hiyo baada ya kuona hakuana juhudi zozote za kuwaokoa kukabiliana na adha ya kuishi katika mazingiara magumu baada ya kufukuzwa.

Baadhi yao akiwemo Salome Mwakifwamba na Michael Mwanyagile walisema mbali na kuteswa kwa muda mrefu huo bila hata huruma serikali imeshindwa hata kuwatafutia maeneo mbadala na kuwalipa fidia zao mapema.

Walisema  walihamishwa kinguvu kupisha hifadhi ya Ruaha mwaka 2008  na kumuomba  Mkuu wa wilaya kuwasaidia katika suala la fidia kwani hivi  wanamaisha duni kutokana na kulipwa fidia kidogo pamoja na kutokuwa na mashamba ya kilimo.

Mkuu wa Wilaya ya Mbarali ,Gulamhussein Kiffu mbali na kupokea kwa madai hayo aliahidi kuyatafutia ufumbuzi ndani ya wiki tatu baada ya kuyafikisha kwenye malaka husika na kurejesha mrejesho.