WATU wanne wauwawa katika maandamano nchini Misri

IDADI  ya watu waliouawa katika maandamano yaliyofanywa na wananchi wanaopinga mapinduzi ya kijeshi yaliyomuondoa madarakani Muhammad Mursi huko Misri imefikia 4 baada ya kuuawa msichana mmoja na kujeruhiwa makumi ya wengine katika mji wa Alexandria.

Waandamanaji wawili waliuawa kwa kupigwa risasi na askari usalama katika eneo la Haram huko Giza katika kumbukumbuku ya mwaka wa kwanza wa mapinduzi ya kijeshi yaliyotokea mwaka jana nchini Misri.

 Raia mwingine aliuawa katika kitongoji kingine cha eneo la Giza katika mapigano ya askari usalama na waandamanaji.

Maelfu ya Wamisri jana walifanya maandamano katika miji mbalimbali ya nchi hiyo kupinga mapinduzi ya kijeshi yaliyoindoa madarakani serikali iliyochaguliwa na wananchi kwa njia za kidemokrasia ya Muhammad Mursi tarehe 3 Julai mwaka jana.

Waandamanaji hao walibeba picha za Mursi na kutoa wito wa kurejeshwa madaraki serikali iliyopinduliwa.

Wakati huo huo Muungano wa Kitaifa wa Kutetea Sheria nchini Misri umesema una nyaraka zinazothibitisha kesi 54 za kubakwa na kunajisiwa wasichana ndani ya korokoro za askari usalama wa serikali ya nchi hiyo. Muungano huo umesema kuwa baadhi ya wasichana hao wamebeba mimba kutokana na kunajisiwa na askari usalama na kwamba wengine walinajisiwa kwenye magari ya polisi baada tu ya kukamatwa.