KATIBU MKUU wa Nishati na Madini awatoa hofu wafanyakazi wa Tanesco

Katibu mkuu wa Nishati na madini Eliakimu Maswi

KATIBU mkuu Wizara ya madini na nishati Eliakim Maswi amewatoa hofu yakutofukuzwa au kupunguzwa kazi kwa wafanyakazi wa shirika la Tanesco kutokana na serikali kuanzisha mkakati na mwelekeo wa kurekebisha mapungufu mbalimbali katika mfumo wa utumishi katika wizara hiyo.

Akifungua kamati ya kubadilisha sekta ndogo ya umeme nchini wenye lengo la kuongeza ufanisi katika utoaji wa huduma za umeme,kuimarisha hali ya kifedha ya TANESCO,kuvutia wawekezaji wadogo,kupunguza ruzuku ya serikali kwa Tanesco katibu huyo alisema mpango huo unalenga kumpunguzia mzigo mlaji wa umeme.

“Ili kutekeleza mpango huu ni lazima kuwe na rasilimali watu na fedha za kutosha...hatuna wazo wala mpango wa kupunguza wafanyakazi na hata kiwango cha Mega watts zinazozalishwa"Maswi aliwatoa hofu wafanyakazi.

Alisema mbali na hilo serikali inakuja na mpango wa kuwahakikishia  usalama wa ajira kwa kuboresha elimu zao makazini,stahili na mikataba yao ikiwa ni kufikia tija iliyokusudiwa kupitia sekta hiyo.

Awali Mwenyekiti kamati ya maendeleo Tanesco Abdul Mkama aliiomba serikali kutatua changamoto mbalimbali zinazowakabili ikiwemo kuondoa hofu na mashaka juu ya maslahi na ajira yao pia siasa zianzoenea mitaani kuwa shirika linavunjwa na kuundwa upya jambo ambalo limekuwa likiwaathiri.

“Tunaomba dira ya mageuzi isipite ili iwe faida kwa wafanyakazi tunaomba dira maalum na si mabadiliko toka kwa viongozozi tofauti na magari mawili kwa ajili ya wafanyakazi” alisisitiza Mkama.

Baadhi ya wafanyakazi akiwemo Msoma mita Ramadhani Butallah alitaja baadhi ya kero wanazokutana nazo kuwa ni ongezeko la mita mbovu ambazo zimekuwa zikisoma taarifa tofauti na matumizi hivyo kuamsha hasira za wateja dhiidi yao.

“wafanyakazi waelimishwe juu ya madhara ya kutoa bili isiyo sahihi,vishoka wanaolitia hasara shirika wadhibitiwe kwa kuchukuliwa hatua kali za kisheria lakini pia serikali iweke ukaguzi wa mara kwa mara kwenye mita za umeme ” alisema Butallah.

Wakati serikali inakusudia kupandisha idadi ya wateja kutoka asilimia 24 hadi kufikia 50 ya watanzania wote inakusudia kuanzisha soko huru la nishati ya umeme lenye ushindani.