KIVUKO cha mto Kilombero chakusanya milioni 776

Kivuko Mto Kilombero, mkoani Morogoro

KATIKA kipindi cha miezi 11 mwaka huu kivuko cha mto Kilombero kimedaiwa kukusanya shilingi 776,229,336 katika makusanyo yake wakati wa uvushaji watu na magari.

Hayo yalisemwa na mkuu wa kivuko cha mto Kilombero Mhandisi Fadhil HarounMeneja kwa niaba ya Meneja wa Temesa mkoa wa Morogoro Mhandisi Magreth Mapula kwenye kikao cha bodi ya kivuko hicho kinachotoa huduma ya kuvusha watu na vyombo vya usafiri viendavyo na kurudi wilayani Ulanga.

"katika kipindi cha Januari hadi Juni kivuko kilikusanya shilingi 347,151,286 wakati katika kipindi cha Julai hadi Novemba kivuko kilifanikiwa kukusanya shilingi 429,078,050 na kufanya jumla hiyo hapo juu"ilisema sehemu ya taarifa ya Magreth.

kwa mujibu wa meneja huyo kunachangamoto ya mafuriko na uharibifu mkubwa wa miundombinu,magari kugonga kivuko na kutumbukia majini,majani na nyavu kujisokota kwenye mfumo wa usukani wa kivuko na mchanga kujaa mtoni kunakosababisha kina kupungua.

Kwa upande wao wajumbe wa bodi ya kivuko hicho akiwemo mbunge wa jimbo la Ulanga magharibi Dk Haji Mponda walimtaka wakala wa ufundi na umeme Temesa mkoa wa Morogoro kuharakisha ujenzi wa vibanda vya kujikinga na mvua na jua kivukoni hapo.

Aidha walikitaka kivuuko hicho kuongeza pato lake ili kiweze kumudu kugharimia changamoto zinazojitokeza na kukifanya kuwa na tija katika utendaji wake.

Wazo hilo liliungwa mkono na mwenyekiti wa kikao hicho ambaye ni mkuu wa wilaya ya Kilombero Hassan Masala akionyesha masikitiko yake ya jinsi ambavyo mawazo ya bodi hayatekelezeki na kukatisha tamaa bodi hiyo kwa ushauri wake.