MANISPAA ya Morogoro kuwaburuza mahakamani watakaokutwa na mazingira machafu

Mbunge wa Morogoro mjini Abdul Aziz Mohamed Abood

HALMASHAURI ya Manispaa ya Morogoro ikishirikiana na idara ya Afya mkoani humo imetangaza kiama kwa wanaokaidi usafi katika maeneo wanayoishi kwa kufanya ukaguzi wa nyumba kwa nyumba na kuwaburuza mahakamani wote watakaokutwa na mazingira machafu Mei 18.

Wakizungumza kwa nyakati tofauti na maafisa Afya kata zote 29 ofisi ya Afya Manispaa, Afisa afya mkoa Carle Lyimo na Afisa afya Manispaa Gabriel Malisa walisema zoezi hilo linaloanza Mei 11 linalenga kuuepusha mji huo na magonjwa ya milipuko.

“kwenye hili tuache siasa tukizingatia kanuni zetu za utumishi yani hakuana kilicho na thamani zaidi ya uhai wa mtu,ikumbukwe kuwa kipindi hiki nicha masika,kina magonjwa hatari yakiwemo ya milipuko sasa lazima tufanye kazi kabla ya athari”alisema Lyimo.

Aliongeza zoezi hilo litakaloendeshwa kisayansi litaanza Mei 11 kwa kutambua matatizo yaliyo kwenye nyumba na kujaza fomu namba moja sambamba na kupewa maagizo yatakayotakiwa kutekelezwa ndani ya siku tatu.

Kuhusu wajasiliamali wakiwemo mama na baba lishe,wafanya biashara ndogondogo aliwataka kuzingatia sheria na taratibu za afya kwa kufanya shuguli zao huku akisisitia hakuana atakae ruhusiwa kupanga chini bidhaa.

 

Afsa huyo alisema baada ya zoezi na muda huo maafisa afya hao watapita tena kuhakiki kama maelekezo yametekelezeka na kupewa alama A-D ambazo zitatumika kuwaburuza mahakamani.

Kwa upande wake Malisa aliwataka watu wote waliotelekeza viwanja,magofu ya majengo,waliolima mjini na kupanda mazao kinyume na sheria za mipango miji kuanza kuyafanyia usafi maeneo yao kabla hatua za kisheria hazijawafikia.

“kunatabia ya watu kudharau wakidhani kuwa hii ni nguvu ya soda pekee, mimi nawasihi kuepusha shari kabla haijawakuta maana usafihuu hautakuwa wa muda mfupi kwani tunakusudia kuitumia sheria yetu ya usafi kikamilifu” alisema Malisa

Hivi karibuni manispaa hiyo ilipitisha sheria kali ya faini ya shilingi 50,000 kwa atakae bainika kufanya uchafuzi wa mazingira katika mji huo ikiwa ni hatua moja wapo ya kuifanya manispaa hiyo kuwa Jiji.