TAWA yatwaa ubingwa kombe la Mbena

Wananchi kijiji cha Tawa, Morogoro vijijini wakiangalia mpira 

MICHUANO ya kombe la Mbena wilayani Morogoro imekamilisha awamu  ya kwanza kwa kumpata bingwa wa kata ya Tawa baada ya Tawa Stars kuiralua 2-1 timu ya Chipkizi Stars kutoka kijiji cha Mfidigo katika fainali iliyofanyika katika uwanja wa Tawa.

Michuano hiyo inayofanyika kwa Kata lengo likiwa kupata timu itakayoshiriki ligi kuu nchini kwa mujibu wa ahadi ya mbunge wa jimbo la Morogoro Mashariki Prosper Mbena ilijumuisha timu nane katika kata hiyo.

Mabao ya Tawa yaliyoiwezesha timu kupata seti ya jezi na Mpira yalipatikana dakika ya 32 na 40 wafungaji wakiwa Emanuel Bisi na George Evarist wakati Chipukizi iliyoambulia seti ya jezi pekee ilitolewa kimasomaso na Tanziru Mpando dakika ya 82.

“nimeamua kuanzisha michuano ya Kata kwanza tupate wachezaji mahili tutakaounda nao timu itakayoweka ushindani na tufanikiwe kuingia ligi kuu lakini tuwe na timu tishio katika jimbo na baadae wilaya…nimeanza na kata ya Tawa baadae tutaenda kata nyingine”alifafanua Mbena.

Alisema michuano hiyo itafanyika kwa kupata timu mshindi wa kila kata baadae kwenda kupata timu mshindi wa jimbo huku mipango ikiendelea kupata taratibu za timu wilaya itakavyoundwa kwa lengo la kupata timu itakayoshiriki ligi kuu kabla ya miaka mitano kuisha.

Wilaya morogoro inayokabiliwa na changamoto mbalimbali ikiwemo ya ukosefu wa miundombinu ya michezo kama viwanjakutokana na jiografia yake  haijawahi kuwa na timu katika michuano ya ligi kuu ambayo imekuwa ikifanyika hapa nchini sambamba na kuwepo kwa ligi hiyo nchini.