ASILIMIA 90 ya watanzania wanatumia nishati ya mkaa kwa matumizi mbalimbali

TAFITI zinaonesha kuwa asilimia 90% ya watanzania wanategemea nishati ya mkaa katika matumizi mbalimbali hasa waishio vijijini ambao hutegemea uchomaji wa mkaa  kuwa chanzo cha kujipatia kipato.

Wakiongea na Mbiu ya Maendeleo hivi karibuni  katika kijiji cha Msimba  wilayani Kilosa,mkoani Morogoro ,wafanyabiashara ya mkaa wamesema kuwa hali hiyo imejitokeza katika maeneo mengi hapa nchini baada ya wananchi wanaoishi kandokando ya misitu kujishughulisha na uchomaji wa mkaa ikiwa ndio shughuli kuu ya kuwapatia kipato.

Kupitia mradi wa mkaa endelevu uliopo chini ya shirika la kuhifadhi misitu ya asili Tanzania TFCG unafadhiliwa na shirika la maendeleo la USWISS wananchi wanaochoma mkaa wilayani Kilosa Mkoani Morogoro wameiomba serikali kusogeza karibu huduma ya upatikanaji wa vibali na leseni za ukataji wa miti katika vijiji vyao ili kupunguza usumbufu wa ufuatiliaji vibali hivyo katika ofisi za wilaya.